автор: Timirkhan
Оҕо саас таптала

Үөскээбит алааһым күндү көстүүтэ
Эргиттэ оонньуулаах, көрдөөх күннэрбин,
Алтан от үрдүнэн лыах үөрүн көтүтэ
Санатта миэхэҕэ урут ааспыты.

Үөрүүнү кынаттыыр тыалга уйдаран,
Лыах тэҥэ көтөрбүт торҕо күөҕүнэн,
Дьэдьэннээх,сир астаах кырдалга айдааран.
Туолара тулата оҕо көрүнэн.

Алааһым киэлитэ, ытык хатыҥа
Сылтан сыл чэчирии тупсар курдуккут.
Дууһаҕа тутулла, күндү сир аатыра,
Ханнык да көстүүттэн быдан ордуккут.

Ахтылҕан аргыстаах сыллар кэнниттэн
Төрүт буор сылааґын билэн эрдэҕим,
Күүппүттүү симэммит алааһым иэниттэн
Оҕо саас тапталын булан иэйдэҕим.