СЫБААЙБА ЫРЫАТА Печать    
Петр Тобуруокап тыллара

Эҕэрдэ эһиэхэ, эдэр дьон!
Тэҥнээхтэр кэргэннии буолбуккут,
Олоххут кэскилип кэҥэтэн,
Тапталга дьолгутун булбуккут.

Ыал гыммыт, дьон-сэргэ оҥорбут
Төрөөбүт советскай дойдугут
Эһиги дьиэҕитин олохтуур,
Эһиги дьолгутун уруйдуур!

Норуокка маанылаах майгынан
Үтүө ыал бастыҥа ааттаныҥ,
Күннэтэ үлэҕэ хайҕанан
Аҥардас махталга ахтыллыҥ!

Олоххут унаардаах устата
Бараммат сыбаайба буолуохтун,
Ил-эйэ, дьол-соргу—барыта
Бу дьиэҕэ уйатын туттуохтун!

Эҕэрдэ эһиэхэ, эдэр дьон!
Эйэлээх, этэҥҥэ олоруҥ,
Дойдугут, норуоккут олоҕун
Дьоһуннук турунан тутуһуҥ!

Аҕыйах сылынан тиэргэҥҥит
Араас көр оонньуунан айманныҥ,
Уоллаах кыыс оҕоҕут сиэттиһэн
Оскуола диэкиттэн сырыстын!

Үчүгэй, доҕоттоор, үчүгэй
Үлэ— дьол, үлэ —чиэс кэмигэр
Уйгута-быйаҥа дэлэгэй
Эйэлээх олоххо олорор!

Эҕэрдэ, эдэр дьон, эһиэхэ!
Эҕэрдэ байылыат олоххо!
Эҕэрдэ советскай киһиэхэ —
Сир үөһэ дьоллоохтон дьоллооххо!


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).