ЭН СУРУККАР Печать    
Наталья Михалева - Сайа тыллара

Эн илииҥ сылааһын иҥэрбит,
Эн истиҥ мичээргин саһыарбыт
Кынаттаах илдьиккин бу туттум,
Күн уотун сүрэхпэр киллэрдим.

Долгуйа, дьолбуттан туймаара
Кынаттаах суруккун бу туттум,
Тыыммакка, сүрэхтиин сэгэйэ
Эн күндү куоласкын иһиттим...

Баҕардар үөрүнньэҥ сүрэххин
Хомолто холустук хам тутуо,
Баҕардар эйэҕэс бэйэҕин
Ким эрэ хаҕыстык хаарыйыа...

Оччоҕо ыраахтан да өйдүөм,
Эн күндү мөссүөҥҥэр төҥкөйүөм,
Алыптаах тыллары сипсийиэм,
Аймаммыт дууһаҕын уоскутуом.

Эн илииҥ сылааһын иҥэрбит,
Эн истиҥ мичээргин саһыарбыт
Кынаттаах илдьиккин бу туттум,
Күөх уотун сүрэхпэр киллэрдим.

Долгуйа, дьолбуттан туймаара
Кынаттаах суруккун бу туттум,
Тыыммакка, сүрэхтиин сэгэйэ
Эн күндү куоласкын иһиттим...


 

Сайт зарегистрирован в Федеральном Агентстве
по информационным технологиям
Свидетельство №11945 от 6 мая 2008 года

Автор проекта - Синильга
сайт открыт 17 августа 2007 © Ырыа кырдала
Условия использования материалов, размещенных
на сайте «Ырыа кырдала»

Доступ к сайту бесплатен для пользователей
Экспресс-Сеть, Гелиос-ТВ, ЯГУ, Наука, Оптилинк, Сахаспринт и по льготному пиринговому тарифу
для сетей ADSL и "Столица" (7 коп./1 мб).